«Оралхан Бөкей атындағы №44 лицейі» КММ Лицейішілік олимпиада қорытындысы

«Білімді ұрпақ-ұлт болашағы. Қазақстанның болашағы білімді жастардың қолында» -деп ҚР Президенті Қасым- Жомарт Тоқаев өз сөзінде келешек ұрпақтың сапалы білім алуына жүйелі түрде көңіл бөлу қажеттігін атап өткен болатын. Осы орайда, келешек ұрпаққа сапалы білім беру заман талабына айналды. Сапалы білім көрсеткіштерінің бірі пәндік олимпиада болып табылады. Осы негізде Оралхан Бөкей атындағы №44 лицейінде 20-21 қараша күндері гуманитарлық, жаратылыстану-математикалық бағыттағы негізгі пәндер бойынша 8-11сынып оқушылары арасында лицейішілік пәндік олимпиада болды. Олимпиада оқушылардың оқу-танымдық қабілеттерін ынталандыру, пәндік білімдерін тереңдету, ғылымға деген қызығушылығын дамыту, қалалық және облыстық олимпиадаларға қатыстыруға іріктеу және дайындықтарын пысықтау мақсатында ұйымдастырылды. Олимпиадаға 165 оқушы қатысып, Google Диск платформасында өткізілді. Олимпиада сағат 15.00-де басталып 17.00-де аяқталды. Қазақ тілі, орыс тілі, тарих пәндері бойынша екі кезеңнен, қалған негізгі пәндер бойынша бір кезеңнен жүргізілді. Тапсырмалар алдын ала кафедра отырыстарында талқыланып, жинақталып, лицей директорымен бекітілді. Олимпиада барысында орын алған кемшіліктер болған жоқ. Олимпиададағы білім додасы оңай емес. Ол жарысқа «жүзден жүйрік» шыққандар ғана қатысады. Қас пен көздің арасында жаңарып жатқан ақпараттар тасқынынан, өзіне қажетті білім нәрін іріктеп ала алатын, өз бетімен ізденетін, қажырлы, еңбекқор, өзінше намысы бар оқушылар ғана жүлделі орынға ие бола алады.
Олимпиада қорытындысы бойынша олимпиада жұмыстары мұқият тексеріліп, 123 оқушы жүлделі 1,2,3 орындарды иеленді.
Оқушылардың білімін сарапқа салып, жүлделі І,ІІ орындарға ие болған 83 оқушы олимпиаданың қалалық кезеңінің тізіміне енгізілді.
Лицейіміздің білімді ұстаздар ұжымы қалалық олимпиадаға өз оқушыларын үлкен дайындықпен жібергелі отыр. Лицейіміздің білімді оқушыларына сәттілік тілей отырып, өз жетістіктерімен бізді қуантады деген үлкен сенімдеміз.